परासी । नेपाल जेसीजको क्षेत्र घ अन्तर्गतका शाखाहरुको अध्यक्षीय बैठक पश्चिम नवलपरासीको परासीमा शुरु भएको छ । नव बर्ष २०८० को अवसरमा नेपाल जेसीजले आफ्नो क्षेत्र घ अन्तर्गतका शाखा अध्यक्षहरुको बैठक परासीमा आयोजना गरेको हो ।
नेपाल जेसीज क्षेत्र घ का निरुपित राष्ट्रिय कार्यकारीणी उपाध्यक्ष तेजप्रसाद उप्रेतीको अध्यक्षतामा गरिएको बर्ष २०२३ को क्षेत्र घ को बैठकमा प्रमुख अतिथि रामग्राम नगरपालिकाका नगरप्रमुख धनपत यादवले आफू रामग्राम जेसीज बर्ष २०१२ को अध्यक्ष रहि नेतृत्व र व्यक्तित्वको विकास गर्दै हाल नगरप्रमुख जस्तो जिम्मेवार स्थानमा पुगेको बताउनु भयो । नेपाल जेसीज क्षेत्र घ का युवा शाखा अध्यक्षहरुलाई उद्यमीबन्न आग्रह गर्दै नगरप्रमुख यादवले नेतृृत्व र व्यक्तित्व विकासका लागि जेसीज बलियो प्लेट फर्म भएको जिकिर गर्नु भयो ।
सो कार्यक्रममा रामग्राम नगरपालिकाका नगरउप्रमुख संझना चौधरी, संस्थापक अध्यक्ष श्यामकुमार बस्याल, रामग्राम जेसीजको मातृशाखा बुटवल जेसीजका अध्यक्ष बिक्रमजंग कुँवर, शाखा अध्यक्ष बेनीमाधव वस्याल, महासचिव विष्णुराज राय लगायतले आ आफ्ना भनाई राख्नुभएको थियो ।
यसअघि शुक्रवार साँझ परासीमै रामग्राम जेसीजले नव वर्ष २०८० को अवसरमा जेसीज साँझ गरी शुभकामना आदान प्रदान गरेको थियो । नेपाल जेसीजमा देशभर १७८ वटा शाखा छन् भने क्षेत्र घ मा जम्मा ५६ वटा शाखा रहेको नेपाल जेसीजले जनाएको छ ।
