सुनवल । सामुदायिक वन उपभोक्ता महासंघ नेपाल स्थानीय महासंघ सुनवलको अध्यक्षमा कर्ण बहादुर शेन चयन हुनुभएको छ । सुनवल नगरभित्रका १४ वटा स्थानीय वन उपभोक्ता समूहका पदाधिकारीहरुको उपस्थितिमा महासंघको दोस्रो अधिवेसनले अध्यक्षमा शेन संगै नया कार्यसमिति सर्वसम्मत चयन गरेको निर्वाचन अधिकृत तथा सामुदायिक वन उपभोक्ता महासंघ जिल्ला अध्यक्ष कमल परियारले जानकारी दिनुभयो ।
नवनिर्वाचित समितिको उपाध्यक्षमा धन प्रसाद तिवारी, सचिवमा झविकला ढकाल, कोषाध्यक्षमा डिल्लीसरा गाहा पुन र सदस्यहरुमा क्रमश सोमनाथ काफ्ले,मिना क्षेत्री, दिलमाया सुनार, अवधराज यादव, केशव प्रसाद चौधरी, गौमाया गुरुङ र जितबहादुर पुन रहनुभएको छ ।
सामुदायिक वनको विधान,कार्ययोजना र वन ऐन २०७६ भित्र रहेर काम गर्न नवनिर्वाचित पदाधिकारीहरुलाई आग्रह गर्दै परियारले २०५२ साल देखी अहिले सम्मका सामुदायिक वनका उपलब्धीहरु एवं सामुदायिक वनले ल्याएको प्रभावका वारेमा जानकारी गराउनुभएको थियो ।
सुनवल नगरपालिकामा समृद्धिका लागि वन कार्यक्रम सञ्चालन हुन गईरहेको र त्यसका लागि वन प्राविधिकको नियुक्ति पनि गरिसकिएको निवर्तमान अध्यक्ष एवं सुनवल वडा न ६ का वडाध्यक्ष हिमलाल शर्मा चापागाईले जानकारी दिनुभयो । उहाले सामुदायिक वनहरुको हक हित र अधिकारको रक्षा तथा सामुदायिक वनहरुलाई सशक्तिकरण गर्ने अभियानमा आफु निरन्तर लागिरहने बताउनुभयो ।
नवनिर्वाचित अध्यक्ष शेनले आफ्नो कार्यकालमा नगरस्तरीय वनलाई व्यवस्थित गर्दै लैजाने बताउनुभयो । दर्ता नभएका वनलाई दर्ता गर्न पहल गर्ने र दर्ता भएका वनलाई पनि विधिवत रुपमा सुशासन तथा सशक्तिकरण गर्दै समस्या समाधानका लागि सम्बन्धित निकायमा पहल गर्ने नवनिर्वाचित अध्यक्ष शेनको भनाई छ ।
कार्यवाहक अध्यक्ष टिचन गुरुङको अध्यक्षतामा सम्पन्न उद्घाटन कार्यक्रममा सामुदायिक वन उपभोक्ता महासंघ जिल्ला महासचिव सारदा पोखरेल, सदस्य डिलक राज डुमे्र, वडा सदस्य गौमाया गुरुङ लगायतको उपस्थिति रहेको थियो ।सो अवसरमा वनका विभिन्न समितिहरु पनि गठन गरिएको जनउदय सामुदायिक वनका अध्यक्ष वलबहादुर थापाले जानकारी दिनुभयो ।
