ब्वाँसाहरूको हालीमुहाली भएपछि
सज्जन ठगिन्छन् नै दुष्ट दमाली भएपछि
देशले काँचुली फेर्न सक्दैन कहिल्यै
परिवर्तनका अगुवाहरू नै जाली भएपछि
शकुनिहरू पनि सल्लाहकार हुन सक्छन्
भीष्म, द्रोण र कृपको रखवाली भएपछि
अर्जुनको दृष्टि किन अन्यत्र जान्थ्यो र
अगाडि वरमालामा पाञ्चाली भएपछि
चण्डमुण्ड पाखा लाग्ने नै छन् कुनै दिन
तमाम अवलाहरू क्रुद्ध काली भएपछि
कानुनको मुख पनि त बन्द हुँदो रहेछ नि
मिचाहा दुःशासन बलशाली भएपछि
–डा. श्यामप्रसाद न्यौपाने
