सुनवल । सामुदायिक वन दिवस दिवसको अवसरमा आज पश्चिम नवलपरासीको सुनवलमा गरिवी न्युनिकरणमा सामुदायिक वनको भुमिका विषयक अन्तरक्रिया गरिएको छ । सुनवल नगरपालिका वन वातावरण तथा विपद् व्यवस्थापन समिति र सामुदायिक वन उपभोक्ता महासंघ नेपाल नगर महासंघ सुनवलको संयुक्त आयोजनामा अन्तरक्रिया गरिएको हो ।
नगरपालिकाका वन वातावरण तथा विपद् व्यवस्थापन समिति संयोजक एवं सुनवल वडा नं. ६ का वडाध्यक्ष हिमलाल शर्मा चापागाईको अध्यक्षता तथा सुनवल नगरपालिका नगर प्रमुख विमला अर्यालको प्रमुख आतिथ्यतामा कार्यक्रम सम्पन्न भएको हो ।
कार्यक्रममा डिभिवन वन कार्यालय नवलपरासीका प्रमुख महेन्द्र वाग्लेले वनलाई उत्पादन, रोजगारी र संरक्षणको रुपमा अगाडी बढाउनुपर्ने बताउनुभयो । वनलाई उद्यमको रुपमा अगाडी बढाएर रोजगारी सिर्जना गर्नुपर्ने उहाको भनाई थियो । सामुदायिक वन उपभोक्ता महासंघ केन्द्रिय सदस्य कमल परियारले वन विनाशले खानेपानीका मुहान सुक्दै गएको बताउदै सामुदायिक वनमा सरकारले लगाएको २५ प्रतिशत कर एकद्धार प्रणालीमा हुनुपर्ने बताउनुभयो ।
कार्यक्रममा सामुदायिक वन उपभोक्ता महासंघ केन्द्रिय सदस्य टिचन गुरुङ, खानेपानी महासंघ प्रदेश अध्यक्ष थान प्रसाद गैरे, जिल्ला अध्यक्ष शारदा पोखरेल, लगायतले आ आफ्ना भनाई राख्नुभएको थियो । नगर महासंघ अध्यक्ष कणर् बहादुर शेनको स्वागत मन्तव्य रहेको कार्यक्रमको संचालन नगरपालिकाका वन अधिकृत विशाल न्यौपानेले गर्नुभएको थियो ।
नेपालको कुल भू-भागको ४४ दशमलव ७४ प्रतिशत क्षेत्रफल वनले ढाकेको छ । नेपालमा अहिले २२ हजार ५ सयभन्दा धेरै सामुदायिक वन उपभोक्ता समूहले झण्डै २३ लाख ६० हजार राष्ट्रिय वनको संरक्षण, व्यवस्थापन र उपयोग गरिरहेका छन् ।वन विभागका अनुसार यसबाट झण्डै ३० लाख ८८ हजार लाभान्वित भएका छन् । वनको संरक्षण, व्यवस्थापन र सदुपयोगको जिम्मेवारी स्थानीय उपभोक्तालाई नै दिनुपर्छ भन्ने अवधारणाकासाथ चार दशक अघि शुरु भएको सामुदायिक वन कार्यक्रम अहिले नेपालमा मात्र नभइ विश्वभर नै नमुना कार्यक्रमका रुपमा परिचित छ ।
