काठमाडौ । नेपाल आइसिसी यू–१९ विश्वकपमा छनोट हुन असफल भएको छ । अफगानिस्तानसँगको निर्णायक खेल वर्षाका कारण रद्द भएपछि समान ७ अंक भएपनि रनरेटमा अघि रहँदै अफगानिस्तान विश्वकपमा छनोट भएको हो । बिहान ९ः३० का लागि तय खेल दिउँसो २ बजे रद्द गरिएको हो ।
पाँच टोली सहभागी विश्वकप एशिया छनोटमा लिगको नेट रनरेटको आधारमा शीर्षस्थानमा रहेपछि अफगानिस्तान विश्वकपमा पुगेको हो ।
गत संस्करण यसै क्षेत्रबाट छनोट हुँदै विश्वकप पुगेको नेपाल यसपल्ट पनि सोही सफलता नजिक पुगेको थियो । तर लिगको अन्तिम खेलमा वर्षाका कारण मैदान भिजेपछि नेपाल विश्वकपमा पुग्न असफल भएको हो ।
गत संस्करणमा नेपाल अफगानिस्तानलाई पराजित गर्दै विश्वकपमा छनोट भएको थियो । यो संस्करणमा नेपाललाई पछि पार्दै अफगानिस्तानले विश्वकप २०२६ का लागि छनोट भएको हो ।
यो संस्करणमा नेपाल र अफगानिस्तानले हङकङ, ओमान र यूएईलाई पराजित गरेका थिए । यू–१९ विश्वकप क्रिकेट सन् २०२६ को जनवरी फेब्रुअरीमा जिम्बाबे र नामिबियामा हुनेछ ।
