काठमाडौं, २०८२ जेठ — हब इन्टरनेशनल एजुकेशनले आयोजना गरेको ‘ग्राण्ड मल्टिडेस्टिनेशन एजुकेशन फेयर–२०२५’ भव्य रूपमा सम्पन्न भएको छ। हबको काठमाडौंस्थित हात्तीसार केन्द्रीय कार्यालय र ललितपुरस्थित कुमारीपाटी शाखामा दुई दिनसम्म सञ्चालन भएको उक्त शैक्षिक मेलामा करिब पाँच सय विद्यार्थी तथा अभिभावकको उल्लेख्य सहभागिता रहेको थियो।

मेलामा सहभागी भएका विद्यार्थी र अभिभावकले अमेरिका, क्यानडा, अस्ट्रेलिया, न्यूजिल्यान्ड, आयरल्याण्ड, जर्मनी, डेनमार्क, स्विडेन, फिनल्याण्ड, भारतलगायत ३० भन्दा बढी देशका प्रतिष्ठित विश्वविद्यालय तथा कलेजका प्रतिनिधिसँग प्रत्यक्ष भेटघाट गर्ने अवसर पाए। प्रतिनिधिहरूले गन्तव्य देशको शैक्षिक प्रणाली, उपलब्ध छात्रवृत्ति, भर्ना प्रक्रिया, शुल्क संरचना तथा अध्ययनको वातावरणबारे विद्यार्थीलाई विस्तृत जानकारी दिएका थिए।

विश्वविद्यालय प्रतिनिधिबाट उपयोगी जानकारी

विदेशबाट आएका विश्वविद्यालय तथा कलेज प्रतिनिधिहरूले मेलामा विद्यार्थीका लागि आकर्षक अवसरहरूको जानकारी गराउँदै उनीहरूको जिज्ञासा समाधान गरेका थिए। प्रतिनिधिहरूले आफ्नो देशमा उपलब्ध प्रमुख कोर्सहरू — बिजनेस, इनफरमेसन टेक्नोलोजी, हेल्थ साइन्स, इन्जिनियरिङ, हस्पिटालिटी, साइकोलोजी लगायतका विषयमा अध्ययन गर्ने अवसर र तिनका विशेषताहरूबारे जानकारी दिएका थिए। साथै, विश्वविद्यालयको भौतिक पूर्वाधार, अनुसन्धान अवसर, अन्तर्राष्ट्रिय विद्यार्थीका लागि विशेष समर्थन प्रणाली, तथा रोजगारको सम्भावनाबारे पनि महत्वपूर्ण जानकारी दिनुभएको थियो।

विद्यार्थीले प्रत्यक्ष रूपमा विश्वविद्यालयको प्रतिनिधिसँग संवाद गर्न पाएको अवसरले उनीहरूलाई आगामी अध्ययन योजनाबारे अझ स्पष्ट दृष्टिकोण बनाउन सहयोग पुगेको थियो। धेरै विद्यार्थीहरूले यस प्रकारको प्रत्यक्ष अन्तरक्रियालाई ‘दिशानिर्देशक’ अनुभव गरेका छन्।

हब इन्टरनेशनल एजुकेशनकी प्रमुख कार्यकारी अधिकृत (CEO) सारिता खड्काले शैक्षिक मेलामा सहभागी सम्पूर्ण विद्यार्थी, अभिभावक तथा विश्वविद्यालय प्रतिनिधिहरूप्रति हार्दिक धन्यवाद प्रकट गर्नुभयो। उहाँले भन्नुभयो, “हामीले आयोजना गरेको शैक्षिक मेलामा विद्यार्थीदेखि प्रतिनिधिसम्मको गहिरो सहभागिताले कार्यक्रमलाई सफल बनाएको छ। विद्यार्थीहरूको जिज्ञासा, प्रतिनिधिहरूको योगदान र अभिभावकको साथले हामीलाई यस्ता ज्ञानमूलक कार्यक्रमहरूलाई अझ प्रभावकारी बनाउँदै लैजान प्रेरणा दिएको छ।”

उहाँले आगामी दिनहरूमा पनि हब इन्टरनेशनल एजुकेशनले यस्ता कार्यक्रममार्फत विद्यार्थीको उच्च शिक्षामा सहजीकरण गर्ने प्रतिबद्धता व्यक्त गर्नुभयो।

विशेष अवसर र सुविधा

मेलाको अवसरमा हबले सहभागी विद्यार्थीहरूलाई अंग्रेजी भाषा परीक्षा तयारी — आइएलटिस र पिटिई — को शुल्क विशेष छुटसहित केवल रू. २,०८२ मा सुरु गर्न सकिने अवसर प्रदान गरेको थियो। बिहान ११ बजेदेखि साँझ ४ बजेसम्म सञ्चालन भएको मेलामा निःशुल्क प्रवेशको व्यवस्था गरिएको थियो।

कक्षा १२ सकाएका र स्नातकपछि उच्च शिक्षाको योजना बनाइरहेका विद्यार्थीहरूका लागि यो शैक्षिक मेला मार्गदर्शन र जानकारीको उपयोगी थलो सावित भएको हब इन्टरनेशनल एजुकेशनले विश्वास लिएको छ। प्रत्यक्ष संवाद, प्रस्ट जानकारी र व्यावहारिक मार्गदर्शनका कारण मेला सहभागीहरूको उत्साहजनक प्रतिक्रिया प्राप्त भएको छ।