पुजा लम्साल,सुनवल । सामुदायीक वनहरुले पनि सामाजिक रूपान्तरणका क्षेत्रमा काम गर्नु पर्नेमा एक कार्यक्रमका वक्ताहरुले जोड दिएका छन् । ३२ औं अन्तराष्ट्रिय लैङ्गिक हिंसा विरुद्धको १६ दिने अभियान अन्तर्गत सामुदायिक वन उपभोक्ता महासंघ नेपाल, जिल्ला महासंघ (फेकोफन) नवलपरासीको आयोजनामा सुनवल ३ नदुवा नवलरासीमा सम्पन्न लैङ्गिक हिंसा सचेतनामुलक कार्यक्रममा सामुदायिक वनहरुले तिनै तहका सरकार तथा विभिन्न संघसंस्थाहरुको सहकार्यमा कार्यक्रम सन्चालन गरी सुढृढ समाज निर्माण गर्नु पर्नेमा सहभागिहरुले जोड दिएका हुन् ।
कार्यक्रममा सामुदायिक वन महासंघका केन्द्रिय सदस्य कमल परियारले धेरै जसो हिंसा हिंसा हो भनि बुझ्न नसकेका कारण हुने भएकाले सामाजिक,राजनैतिक तथा आर्थिक सवै क्षेत्रमा महिलाको संख्यात्मक र व्यवहारिक सहभागीता वृद्धि गर्नुपर्नेमा जोड दिनुभयो । कागजी रूपान्तरण भन्दा पनि व्यवहारिक परिवर्तनको आवश्यकता रहेको फेकोफन केन्द्रिय सदस्य परियारको भनाई छ ।
यस्तै विपद व्यवस्थापक संयोजक एवं सुनवल वडा नं ६ का वडा अध्यक्ष दिलीप चापागाईले महिलाको नेतृत्व विकास र क्षमता विकासका लागि अगाडि बढाउनुपर्ने बताउनुभयो । हिँसालाई विश्लेषण गर्ने र समस्या समाधान गरी सामाजिक रूपान्तरण गर्नुपर्नेमा उहाको जोड थियो । यस्तै सामाजिक बिकास समिति संयोजक भगवती बस्यालले महिला सचेत, शसक्त र जागरुग हुनु आजको आवश्यकता भएको बताउनुभयो ।
कार्यक्रममा प्रमुख अतिथि सामुदायिक वन उपभोक्ता महासंघ (फेकोफन) केन्द्रिय सदस्य टीचन गुरुङले महिला शिक्षित भएमा मात्र पनि ८० प्रतिशत घरेलु हिंसा न्यूनीकरण हुने भएकाले हिंसा न्युनिकरणका लागि सर्वप्रथम घर बाटै जिम्मेवार हुन आग्रह गर्नुभयो । सोही अवसरमा फेकोफन प्रदेश सदस्य कमला थापा, सुनवल नगर महासंघका अध्यक्ष कर्ण बहादुर शेन, नेपाली कांगे्रसबाट शिवानी घिमिरे, राप्रपाबाट दिलकुमारी बुढा, नेकपा माओवादीबाट मिना ढकाल लगायतले पनि स्थानीय सामुदायिक वनहरुले सरकार तथा विभिन्न संघसंस्थाहरुको सहकार्यमा उद्यमशिलता,पर्यापर्यटन,आर्थिक विकास जस्ता विकासशिल कार्यक्रम सन्चालन गर्न सुझाव दिनुभएको थियो ।
सामुदायिक वन उपभोक्ता महासंघ जिल्ला महासंघ नवलपरासीकी अध्यक्ष शारदा पोखरेलले घरको व्यवस्थापन गरेर पनि सामाजिक विकासका काममा सक्रिय हुन सकिने भन्दै जून क्षेत्रबाट भए पनि सशक्त रूपमा अगाडि बढ्न सहभागिहरुलाई आग्रह गर्नुभयो । घर बाटै हिँसा गर्न छोड्नु पर्ने उहाको जोड थियो ।
संस्थाका उपाध्यक्ष दिलकराज डुमे्रको स्वागत मन्तव्य रहेको कार्यक्रमको सञ्चालन सचिव खेमराज सापकोटाले गर्नुभएको थियो ।
