पुजा लम्साल, सुनवल ।
नगरवासीलाई सामान्य स्वास्थ्य प्रयोगशाला (ल्याव)को सेवा लिन महंगो निजी मेडिकल क्लिनिक तथा सुनवल वाहिर जानु पर्ने वाध्यताको अन्त्य गर्दै पश्चिम नवलपरासीको सुनवल नगरपालिकाले नगर मै पहिलो पटक प्रयोगशाला (ल्याव) सेवा सञ्चालन सुरु गरेको छ । सुनवल १ स्थित शहरी स्वास्थ्य सेवा केन्द्रमा नगरमै पहिलो पटक प्रयोगशाला (ल्याव) को आज सोमवार उद्घाटन गरिएको छ ।
यसअघि ल्याब सेवा लिन सुनवलका स्थानिय परासी, देवदह, वुटवल जानु पर्ने वा महंगो शुल्क तिरी निजी स्वास्थ्य संस्था जानुपर्ने वाध्यता थियो । बाहिर भन्दा करिब ५० प्रतिशत भन्दा कम शुल्कमा प्रयोगशालाबाट रगत, पिसाब, खकार, दिशा जाँचसंग सम्बन्धित ३२ प्रकारका परिक्षण सेवा प्रदान गरिने छ । यसवाट नगरवासी लाभान्वित हुने नगरपालिकाले अपेक्षा गरेको छ ।
प्रयोगशालाको उद्दघाटन गर्दै जिल्ला समन्वय समिति प्रमुख भगौती यादवले नगरवासीको सहजता र सेवाको लागि सञ्चालन गरीएको ल्याब सेवाले नगर कै स्वास्थ्य क्षेत्रमा एक खुड्किलो उचाई बृद्धि हुने र नगरवासी यसवबाट लाभान्वित हुने बताउनुभयो । उहाले जिल्लाका अन्य स्थानीय पालिकाहरुसँगै सुनवल नगरपालिका स्वास्थ्य क्षेत्रमा लगानी गरी अगाडि बढेको र सेवालाई निरन्तरता एव्ां विस्तार गर्नुपर्ने बताउनुभयो ।
सो अवसरमा नेकपा एमालेका नगर अध्यक्ष दुर्गा सुवेदी, प्रमूख प्रशासकीय अधिकृत चेतनाथ गिरीले प्रयोगशालामा आगामी दिनमा सेवा बृद्धि गर्दै आवश्यक थप उपकरण ल्याउनुपर्ने बताउनुभयो।
कार्यक्रममा नगर प्रमुख विमला अर्यालले नगरवासीको स्वास्थ्यमा पहुंच पुर्याउने उदेश्यले रोगको पहिचान गर्न सहयोग स्वरुप ल्याव संचालन गरीएको बताउनुभयो । आगामी दिनमा डाक्टर सहितको सेवा दिने गरी आफुहरु अगाडि बढेको उहाको भनाई छ । आर्थिक अवस्था कमजोर भएका विपन्नका लागि वडाको शिफारिसमा सेवा प्रदान गर्ने नगर प्रमुख अर्यालले बताउनुभयो । विपन्न संगै अपाङ्ग,अशक्त, गर्भवति महिला, सुत्केरी तथा जेष्ठ नागरीकका लागि निशुल्क सेवा प्रदान गरिने छ ।
यस्तै आगामी दिनमा सुनवल वडा नं १२ मा पनि ल्याव सेवा सुरु गर्ने सुनवल नगरपालिकाका स्वास्थ्य शाखा प्रमुख कृष्ण न्यौपानेले जानकारी दिनुभयो ।
प्रयोगशालामा परीक्षणका लागि आवश्यक उपकरणहरू फेएरमेड, इन्द्रेणी सामाजिक विकास मञ्चले सहयोग गरेका हुन् । प्रयोगशालामा दुई जना ल्याव असिस्टेन्ट जनशक्तिले सेवा दिने छन् ।
