परासी । भनिन्छ संसारको सवै भन्दा नजिकको सम्बन्ध श्रीमान् श्रीमतीको हुन्छ । तर यस्तो गहिरो सम्बन्ध भित्र मृत्यु पर्खिएको पनि हुने गर्दछ । पश्चिम नवलपरासीमा यो नजिकको सम्बन्ध श्रीमान्को मृत्युमा परिणत भएको घटना वाहिरीएको छ । जिल्लाको रामग्राम नगरपालिका वडा नं १४ पर्सावलमा श्रीमान्को हत्या आरोपमा एक महिला पक्राउ परेकी छिन् ।
श्रीमान् २९ वर्षीय अब्दुल नसिम खाँको हत्या आरोपमा उनकी श्रीमती हशिवुन निशालाई प्रहरीले पक्राउ गर्दै घटनाको पर्दाफास गरेको हो । श्रीमती हशिवुन भारतमा सँगै पढेका साथी भारतीय नागरिकसँग मिलेर बिहीबार मध्यराति श्रीमान्को हत्या गरेको रहस्य खुलेको छ । दुवै विचको सम्बन्ध र क्रियाकलापका बारेमा श्रीमान्ले थाहा पाएपछि हशिवुनले हत्याको योजना बनाएको प्रहरीले अनुसन्धानमा खुलेको छ ।
मोबाइलको डाटा केबलले घाँटी कसेर हत्या गरेपछि खेतमा गाडिएको अवस्थामा शव फेला परेको जिल्ला प्रहरी कार्यालयका सूचना अधिकारी डिएसपी भोजराज पाण्डेले बताए।
हत्यापछि हशिवुनले आफ्ना श्रीमान् बिहीबार रातिदेखि हराएको भन्दै खोजीका लागि प्रहरी चौकीमा उजुरी दिएकी थिइन् । तर अनुसन्धान गर्दै जाँदा आफैंले श्रीमान्को हत्या गरेर आफैंले प्रहरीको उजुरी दिन आएको तथ्य खुलेको हो ।
आफूलाई बारम्बार घरेलु हिंसा गर्ने, बालबच्चाको हेरचाह नगर्ने भएकाले साथीलाई बोलाएर हत्या गरेको हशिवुनले प्रहरी समक्ष बयान दिएकी छन् । हत्यामा संलग्न भारतीय नागरिकको नाम प्रहरीले खुलाएको छैन । फरार रहेका उनको खोजी कार्य भइरहेको प्रहरीले जनाएको छ । हत्या आरोपमा उनीहरूमाथि कर्तव्य ज्यानमा मुद्दा दर्ता गरिएको छ ।
