नवलपरासी । केहि समय अघिदेखि लगातारकोे शीतलहरका कारण पश्चिम नवलपरासी लगायत तराई क्षेत्रको जनजिवन कष्टकर बनिरहेको अवस्थामा आज शुक्रवार भने घाम देखिए संगै सर्वसाधरणले केही राहत महशुस गरेका छन् । विगत एक हप्ता,डेढ हप्ता देखी घाम नलाग्दा र चिसो बढ्दा जिल्लाको जनजिवन कष्टकर बनेको थियो ।
यता बढ्दो शीतलहर तथा चिसो मौसमलाई मध्यनजर गर्दै सर्वसाधारणहरुको दैनिकी सहज वनाउन जिल्ला प्रशासन कार्यालय पश्चिम नवलपरासीले सामुहिक आगो ताप्ने व्यवस्थाका लागि जिल्लाका सात वटै पालिकामा पत्राचार समेत गरिसकेको छ ।
जिल्ला प्रशासनले आफ्नो स्थानिय तहमा शीतलहरबाट जोखिममा रहेका घर,परिवार पहिचान गर्ने, आवश्यकताका आधारमा सामूहिक धुनीको प्रवन्ध मिलाउने, सामुहिक धुनीको लागि आवश्यक सहुलियतदरको छुटपुर्र्जी डिभिजन वन कार्यालयबाट प्राप्त गरी दाउराको व्यवस्था मिलाउन निर्देशन दिएको छ ।
यसै अनुरुप जिल्लाका रामग्राम, प्रतापपुर, वर्दघाट लगायतका पालिकाहरुले सामुहिक आगो ताप्नमा सहजता तथा चिसोबाट बच्नका लागि सार्वजनिक स्थल तथा चोकचोकमा दाउरा वितरण गरीरहेका छन् ।
तर अत्यावश्यक कामका लागि वाहिर निस्कीएका मजदुर, व्यापारी लगायत सर्वसाधरणको स्वास्थ्यलाई मध्यनजर गर्दै दैनिक जिवन सहज वनाउन भिडभाड तथा सार्वजनिक स्थानहरुमा सामुहिक आगो ताप्ने व्यवस्था प्रति सुनवल नगर भने उदासिन देखिएको छ । जिल्ला प्रशासनले जारि गरेको पत्रलाई वेवास्था गरी जिल्लाकै सुनवल नगरपालिकाले दाउरा वितरण गर्र्न सकेको छैन । गत वर्षहरुमा चिसो मौसममा सामुहिक आगो ताप्नका लागि दाउरा वितरण गर्दै आएकोमा यस वर्र्ष भने सुनवल नगरपालिकाले उक्त व्यवस्था गर्न असमर्थ रहेको देखिएको छ ।
जिल्ला प्रशासनले स्थानिय तहको अनुरोधमा सहुलियतदरको दाउरा उपलब्ध गराउन डिभिजन वन कार्यालयलाई निर्देशन दिएको छ ।