ललितपुर, लन्डनस्थित प्रसिद्ध रोह्याम्पटन युनिभर्सिटीले ललितपुरको होटल हिमालयमा एक विशेष ‘मेगा इभेन्ट’ को आयोजना गरेको छ। संयुक्त अधिराज्य (यूके) मा उच्च शिक्षा हासिल गर्न चाहने विद्यार्थीहरूका लागि उपलब्ध उत्कृष्ट अवसरहरू र विश्वविद्यालयका कार्यक्रमहरूबारे जानकारी दिने उद्देश्यले यो कार्यक्रम आयोजना गरिएको हो।
कार्यक्रमको औपचारिक सुरुवात गर्दै उद्घोषक (एमसी) ले रोह्याम्पटन युनिभर्सिटीको प्राज्ञिक इतिहास र शैक्षिक अवसरहरूबारे प्रकाश पार्नुभएको थियो, जसलगत्तै राष्ट्रिय गान बजाइएको थियो। त्यसपछि स्वागत मन्तव्य राख्दै कार्यक्रमका होस्ट एवं अफिसियल डाइरेक्टर मिस्टर कमल खड्काले उपस्थित सम्पूर्ण प्रतिनिधिहरूलाई परम्परागत खादा र माला लगाएर न्यानो स्वागत गर्नुभएको थियो।
कार्यक्रमको मुख्य सत्रमा रोह्याम्पटन युनिभर्सिटीकी पार्टनर रिलेसन्स एन्ड ग्रोथ विभागकी एक्जुकेटिभ डाइरेक्टर मिस विधी मिस्ट्रीले विश्वविद्यालयको विश्वव्यापी पहुँच र भावी योजनाहरू समेटिएको एक महत्वपूर्ण प्रस्तुतीकरण दिनुभएको थियो। यस्तै, विश्वविद्यालयका आधिकारिक प्रतिनिधि (टीओआर) मिस्टर निरज गुरुङले रोह्याम्पटनको शैक्षिक वातावरण, पाठ्यक्रम र अन्तर्राष्ट्रिय विद्यार्थीहरूका लागि उपलब्ध सेवा सुविधाहरूबारे आफ्नो मन्तव्य राख्नुभएको थियो।
औपचारिक सत्रहरूको बीच-बीचमा आकर्षक सांस्कृतिक नृत्यहरू प्रस्तुत गरिएका थिए, जसले कार्यक्रममा थप रौनक थपेको थियो। उद्घोषकको समापन मन्तव्यसँगै औपचारिक कार्यक्रम सकिएपछि आमन्त्रित अतिथिहरूबीच आपसी संवाद र शैक्षिक सहकार्यका विषयमा छलफलका लागि नेटवर्किङ सेसन, ककटेल डिनर र मनोरञ्जनात्मक कार्यक्रमको आयोजना गरिएको थियो।
