नवलपरासी । नवलपुरमा आदिवासी जनजाति संगठनहरुले निर्माण गरेका संरचनाहरु भत्काउने, अवरोध गर्ने जस्ता कार्यहरु प्रहरी र प्रशासनबाट भएको र गर्न लगाईएको भन्दै नेपाल आदिवासी जनजाति महासंघ नवलपुरले उक्त कार्यप्रति आफ्नो ध्यानाकषर्ण भएको जनाएको छ । केहीदिन यता नमुना सदरमुकाम भित्र रहेका आदिवासी जनजाति महासंघ नवलपुरको निर्माणाधिन अवस्थामा रहेको संग्राहालय लगायत, बौद्ध गुम्बा विहार र भुजेल समाज सेवा समितिको कम्पाउण्ड भित्रको संरचना निर्माणमा अवरोध गर्ने, निर्माण भईसकेका संरचना भत्काउने, राज्यको एउटा निकायबाट संरचना निर्माणको लागि बजेट दिने अर्को निकायले काममा अवरोध गर्ने जस्ता काम प्रहरी र प्रशासनबाट भएको र गर्न लगाइएको प्रति आफ्नो गम्भीर ध्यानाकर्षण भएको महासंघले विज्ञप्ती मार्फत जनाएको छ । महासंघका अध्यक्ष राम तामाङले जारी गर्नूभएको विज्ञप्तीमा गुम्बा, मन्दिर÷थानहरु, गुठी, आदिवासी जनजाति संग्रहालय निर्माणस्थल, चिहान, चरन क्षेत्र लगायतका क्षेत्र हटाउने, निर्माण कार्य रोक्ने, बनिसकेका संरचना भत्काउने जस्ता कार्य रोक्न माग गरिएको छ । उक्त कार्य नरोकिए नेपाल आदिवासी जनजाति महासंघ नवलपुर, महासंघमा आबद्ध १० जातीय घटक संस्थाहरु र भातृ संगठनहरु मिलेर नवलपुरको प्रहरी र प्रशासनको ज्यादति विरुद्ध एक साथ चरणबद्ध आन्दोलनमा जाने चेतावनी पनि दिएको छ

हेर्नुहोस् विज्ञप्ती