सुनवल । बैदेशिक रोजगारीमा गएका व्यक्तिहरुबाट प्राप्त हुने विपे्रषण रकमको प्रभावकारी उपयोग तथा परिवार र समाजमा आएका विभिन्न सामाजिक विकृतिलाई कम गर्ने उदेश्यले सुनवल वडा नं ५ बनकट्टिमा वित्तीय साक्षरता र मनोसामाजिक परामर्शकक्षा संचालन गरिएको छ । वैदेशिक रोजगारीमा गएका व्यक्तिका परिवारका लागि सुरक्षित आप्रवासन परियोजना सामीले सुनवल नगरपालिकाको समन्वयमा सो कक्षा सुरु गरेको हो ।
बैदेशिक रोजगारलाई सुरक्षित, मर्यादित र भरपर्दो बनाउने उदेश्यले वैदेसिक रोजगारीमा रहेका, वैदेशिक रोजगारीमा गएर आएका र बैदेशिक रोजगारमा जान लागेका व्यक्तिका परिवारका सदस्यलाई सहभागी गराएर बित्तीय साक्षरता कक्षाका साथमा मनोसामजिक परामर्श कक्षा सञ्चालन गरिएको सुनवल नगरपालिकाका रोजगार संयोजक शंकर पन्थीले जानकारी दिए ।
वित्तीय साक्षरताले पैसाको सही उपयोग गर्न सिकाउने, आधारभूत आवश्यकता र चाहानाको फरक छुट्टयान सहयोग गर्ने, आफ्ना अल्पकालीन तथा दीर्घकालीन आवश्यकताहरुको आधारमा लक्ष्य तथा योजना बनाउन सिकाउने, प्राप्त आम्दानीलाई उत्पादनमूलक तथा आम्दानीमूलक क्षेत्रमा लगानी गर्न सिकाउने उपयुक्त वित्तीय सेवा छनोट गर्न क्षमता अभिवृद्घि गर्ने, आम्दानी बढाउँदैं लैजान उत्साहित गर्न र जोखिम पहिचान र व्यवस्थापन गर्ने उपायहरु समेत सिकाउने छ ।
वैदेशिक रोजगारलाई सुरक्षित, व्यवस्थित, मर्यादित, उपलब्धिमुलक एवम् शोषणरहित बनाउन नेपाल सरकार र स्वीस सरकारको द्विपक्षीय सम्झौता अनुसार सुरक्षित आप्रवासन परियोजना नेपालमा सन २०११ देखी सञ्चालनमा आइरहेको छ । श्रम, रोजगार तथा सामाजिक सुरक्षा मन्त्रालयको नीतिगत नेतृत्व, प्रदेश सरकार सामाजिक विकास मन्त्रालयको समन्वयमा सम्बन्धित स्थानीय तहहरूको व्यवस्थापन तथा कार्यान्वनमा यस परियोजनाका कार्यक्रमहरू सञ्चालनमा रहेको छ ।
