ए कर्णालीबासी हो !
किन तुइन चढेको?
सरकरले राजधानीबाट तुइनमुक्त नेपाल बनाइसक्यो त !
जताततै पक्की पुल बनिसकेका छन् त !
फेरि पनि किन तुइन चढ्यौ ?
भाइरल हुन पो हो कि !
पुर्खाले चढेकोले नयाँ पुस्तालाई देखाउन हो कि !
सरकारी पक्की पुलको विरोध गर्न पो हो कि !
तुइन विस्थापित गरेको विरोधमा पो हो कि !
कि कतै आत्माहत्या गर्न तुइन चढेको !
ए सरकार !
मलाई शंका पो लाग्यो त !
कि कागजी पुल बनायौ !
कि बन्दाबन्दै भत्किने पुल बनाउने ठेकदारलाई
जिम्मा दिएकोले
कर्णालीबासीहरु डराएर
तुइनमै झुन्डिएर यात्रा गरे !
कि तुइन बन्द भयो भन्ने सूचना दिएनौ !
कि पक्की पुल उद्घाटन भयो भनेनौ !
कि तिम्रो तुइन विस्थापित भएको कुरा पत्याएनन् ।
कतै संचार माध्यमको आधारहीन समाचार त होइन ??
चौंसठ्ठी जनाले तुइन चुँडिएर र खसेर ज्यान गुमाए रे !
तीन जनाको मात्रै लाश भेटियो रे !
एकसट्ठी जनालाई प्रहरीले वेपत्ताको सूचीमा राखेछन् रे !
एउटै वडाको पच्चीस जनाले ज्यान गुमाए रे !
एक विहानै भालेले उठाउँदा,
सायद कुकुरले आची नखाँदै,
घामको पहिलो किरण नझुल्किंदै,
मैले आङ तन्काउँन नपाउँदै,
यो समचार अफाह फैलाउन प्रसारण गरेको त होइन ??
जे होस् सत्य तथ्य बुझ्नलाई
ए सरकार एउट छानबिन समिति गठन गरियोस् !
पूर्व सरकारले कमजोरी गरे कि !
संचार माध्यमले गलत समचार प्रसारण गरे कि !
कर्णालीबासीले तुइन छोड्न अटेरी गरे कि !
कर्णालीबासी पक्की पुल नचढी नियम उलंघन गरे कि !
कर्णालीबासीलाई तुइनमै झुन्डिएर बजार जान बाध्य पारे कि !
जे होस् सरकार !
कर्णाली नदी
मान्छे खाने
नरपिचास, भूत, प्रेत, राक्षस होइन,
माता, देवी, आमा यस्तै यस्तै बनून् ।
प्रकृति जीवन रक्षक बनून्
प्रकृति भक्षक नबनून् ।
पुराण ल्हेगे चिउरी खर्के
सुनवल-३, नदुवा, नवलपरासी
