पर्वत । प्रत्येक चौमासिकमा एक पटक पारदर्शिताका लागि सार्वजनिक सुनवाई गर्ने कानुनी प्रावधान रहे पनि धेरै स्थानीय तहहरुले नगरेको पाईरहदा पर्वतको जलजला गाउँपालिकाले भने विधिपुर्वक सार्वजनिक सुनुवाई कार्यक्रम सम्पन्न गरेको छ । गाउँपालिकाले चालू आर्थिक वर्षका प्रगती र आगामी योजनाको बारेमा सार्वजनिक सुनुवाइ गरिएको हो ।
कार्यक्रममा बोल्दै जलजला गाँपालिकाका अध्यक्ष राजु प्रसाद आर्चायले सेवाग्राहीका गुनासा लाई स्वागत गर्दै गाउँपालिकाले आगामी दिनमा सेवाप्रवाहलाई थप चुस्त, दुरुस्त र प्रभावकारी बनाउने प्रतिबद्धता जनाउदै आगामी दिनमा नागरिक असन्तुष्टिहरुको सम्बोधन गर्ने र पालिकाको सेवालाई प्रभावकारी बनाउने हिसावले सवै वडामा सार्वजनिक सुनुवाइ गर्न प्रतिवद्ध रहेको बताउनुभयो । आफूहरु सकेसम्म गाउँपालिकाको स्रोत र साधानको समुचित प्रयोग गरि विभिन्न योजना अगाडी सारेर काम गरिरहेको भन्दै अध्यक्ष आचार्यले जनप्रतिनिधी र कर्मचारीहरु लाई गुनासोहरुको सम्बोधन गरि कार्य सम्पादन गर्न निर्देशन दिनुभयो ।
उपाध्यक्ष दिपक आचार्यले जलजला गाउँपालिकाले धेरै काम गर्ने सोच बनाएपनि आन्तरिक स्रोत कमजोर हुँदा कतिपय योजनाहरु अगाडी बढाउन नसकेको बताउनुभयो । तैपनि संघ र प्रदेश सरकार समक्ष जनमुखी कामका लागि योजना लगेर छोडेको हुनाले आगामी आर्थिक वर्षको बजेटमा ति योजनाहरु समाबेश भएर आएमा नमूना काम हुने बताउनुभयो ।
कार्यक्रममा गाउँपालिकाका प्रमुख प्रसासकिय अधिकृत कुशल सुवेदीले वार्षिक योजना तथा कार्यक्रमको बारेमा अवगत गराउदै अहिले सम्म गाउँपालिकाले ५१ प्रतिशत बजेट खर्च गरेको बताउनुभयो । सेवाप्रवाहमा कुनै असन्तुष्टि भएमा सहज र सरल रुपमा गुनासो गर्न हरेक वडा र कार्यालयमा गुनासो पेटिका राख्ने काम अगाडी बढेको जानकारी दिनुभयो ।
कार्यक्रममा गाउँपालिकावासी र जनप्रतिनिधिका बिचमा गाउँपालिकाको सेवा, चालु वर्षका योजना, विषयगत कार्यालयका सेवाप्रवाहमा गुनासो, स्रोतको परिचालन, उपलब्धी र कमजोरीका बारेमा व्यापक रुपमा चर्चा भयो । जलजला गाउँपालिकाले अन्य स्थानीय तहभन्दा फरक र दुरगामी प्रभाव पार्ने कार्यक्रम अगाडी सारेको भन्दै कतिपयले प्राकृतिक स्रोतको समुचित उपयोग नभएको, फोहोर ब्यबस्थापन प्रभावकारी नभएको, वडामा कर्मचारीहरुले दिने सेवामा कमजोरी रहेको, गुणस्तरीय स्वास्थ्य सेवा नभएको, सडकहरु सहज नभएको जस्ता समस्याहरु राखेका थिए ।
