सुनवल । नवलपरासी सेवा समाज युएईले आर्थिक अभावका कारण उपचारमा कठिनाई भई उपचारमा समस्या भएका ३ जना विरामीहरुलाई उपचारका लागि आर्थिक सहयोग हस्तान्तरण गरेको छ ।
समाजले सुनवल-११ जर्गाहामा आज एक कार्यक्रमका बीच सुनवल -११ धुर्कोटका १० बर्षिय ब्लड क्यान्सर पीडित शिशिर राना मगर, जर्गहाका ३६ बर्षिय स्तन क्यान्सर पिडित रुपा राना मगर र सुनवल-१२ का मृगौला पिडित कमल बहादुर क्षेत्रीलाई जनही ३१ हजार रुपैयाँ आर्थिक सहयोग गरेको समाजका प्रचारप्रसार प्रमुख मनोज राज पाण्डेले जानकारी दिनुभयो । समाजले साउनको नियमित बैठकको निणर्य अनुसारनै आर्थिक सहयोग हस्तान्तरण गरेको पाण्डेले बताउनुभयो ।
समाजका संस्थापक अध्यक्ष मित्रलाल पाण्डेको अध्यक्षतामा भएको कार्यक्रममा कुल बहादुर राना, सुनवल प्रेस क्लबका अध्यक्ष रमेशकुमार भुसाल, कोटहीदेवी सामुदायिक वन उपभोक्ता समुहका अध्यक्ष इश्वरी आचार्यले समाजले गरेका सहयोगका कार्यलाई निरन्तरता दिन आग्रह गर्नुभयो ।
सो अवसरमा बिमारीको तर्फबाट शिशिर रानाका बुवा नरेश केसिले सहयोग रकम लिदै खुशी व्यक्त गर्दै धन्यवाद दिनुभयो । समाजले अपाङ्गता, अशंक्त, दिर्घरोगी, आर्थिक अवस्था कमजोर भएका परिवारलाई सहयोग गर्दै आउनुका साथै सामाजिक र मानवीय कार्यमा समेत सहयोग गर्दै आएको छ । सहयोग कार्यक्रमको संचालन युवराज पुनको रहेकोे थियो ।
