नवलपुर । नवलपुरको विनयी त्रिवेणी गाउँपालिका -२, मा ७ दिने उद्घोषण तालिम सम्पन्न भएको छ । विनयी त्रिवेणी वडा नम्बर २ को आयोजनामा चैत ८ गतेदेखि सञ्चालित सात दिने उद्घोषण तालिम आज सम्पन्न भएको हो । तालिमको समापन कार्यक्रममा बोल्दै कार्यक्रमका प्रमुख अतिथि गाउँपालिका उपाध्यक्ष भगवती बैदवार क्षेत्रीले महिलाहरूको क्षमता विकासमा यस्ताखालका तालिम प्रभावकारी बन्ने बताउनुभयो ।
महिलाहरूमा बोल्ने कलाको विकास गर्दै कुनैपनि क्षेत्रमा सफल रुपमा नेतृत्व लिन सक्ने बनाउन तालिमले सहयोग पुग्ने बताउँदै तालिममा सिकेका सीपको सदुपयोग गर्दै भोलिका दिनमा विभिन्न क्षेत्रमा आफूलाई अब्बल रुपमा उभ्याउन सकियोस् भन्दै सहभागीलाई शुभकामना दिनुभयो ।उहाँले पालिकाले समेत महिलाको क्षेत्रमा निरन्तर कामगर्ने र महिलालाई विभिन्न प्रकारका सीप गर्दानगर्दै दक्ष र आत्मनिर्भर बनाउन लाग्ने बताउनुभयो ।
समापन कार्यक्रममा बोल्दै विनयी त्रिवेणी -२, का वडा अध्यक्ष पुष्पा आलेमगरले महिलाको क्षमता विकास गर्ने उद्देश्यले उद्घोषण तालिमको आयोजना गरिएको बताउनुभयो । आफ्नो कार्यकालमा महिलाहरूलाई क्षमतावान बनाउन, विभिन्न सीपमुलक तालिम प्रदान गरि आत्मनिर्भर बनाउन कुनै कसर बाँकी नराखी काम गर्ने समेत वडा अध्यक्ष पुष्पा आलेमगरले बताउनुभयो ।तालिमको समापन कार्यक्रममा वडा सदस्य लगायतको सहभागिता रहेको थियो ।
सात दिन सम्म वडा नम्बर २ को मगर सामुदायिक भवनको हलमा भएको उद्घोषण तालिममा वडा भित्र रहेका विभिन्न टोलका गरि करिब ३५ जना महिलाहरूको सहभागिता रहेको थियो । सात दिने तालिममा नवलपुर पे्रसका प्रबन्ध निर्देशक दयाराम आचार्यले सहजिकरण गर्नुभएको थियो ।
