नवलपुर । नेपाली कांग्रेसका नेता एवं संघीय सांसद डा. शशाङ्क कोइरालाले समाज रूपान्तरणमा पत्रकारको ठूलो भूमिका रहने बताउनु भएको छ । नेपाल प्रेस युनियन नवलपरासी पूर्व नवलपुरको एघारौं साधारण सभा तथा अधिवेशन कार्यक्रममा बोल्दै नेता कोइरालाले भन्नुभयो ‘जसले पत्रकारिता बुझेको छ, समाचार स्रपे्रषण गर्छन् , तिनिहरुको समाज रूपान्तरणमा ठूलो भूमिका हुन्छ । ’ नेता कोइरालाले निष्पक्ष भएर समाचार सम्प्रेषण गर्नु पत्रकारको कर्तव्य भएको समेत बताउनुभयो । नेता कोइरालाले संसद्मा भ्रष्टाचारको विषयमा आफूले बोलेको विषयको प्रष्टिकरण समेत दिनुभएको थियो ।
नवलपुरको कावासोतीमा भएको नेपाल प्रेस युनियन नवलपरासी पूर्व नवलपुरको एघारौं साधारण सभा तथा अधिवेशनका क्रममा चार जना पत्रकारलाई सम्मान समेत गरिएको छ । नेपाल प्रेस युनियन नवलपुर शाखाले प्रदान गर्दै आएको सूर्यभक्त पतनादेवी राष्ट्रिय पत्रकारिता पुरस्कारबाट राससका कार्यकारी सम्पादक एवं प्रदेश तथा जिल्ला ब्युरो प्रमुख सूर्य चन्द्र बस्नेत सहित चार जना पत्रकारलाई सम्मान गरिएको हो ।
सूर्यभक्त पतनादेवी स्मृति राष्ट्रिय पत्रकारिता पुरस्कार २०७८ र २०७९ बाट बस्नेत सहित ,बिबिसी नेपाली सेवाका ईश्वर जोसी , डा. भूमिराज चापागाईँ र नेपाल टेलिभिजन सञ्चालक समिति अध्यक्ष समिरजङ साह सम्मान गरिएको हो । चारै जनालाई जनही रु. २५ हजार सहित सम्मान गरिएको नेपाल पे्रस युनियन नवलपुरका अध्यक्ष विरेन्द्र पराजुलीले बताउनुभयो । नेपाल प्रेस युनियन नवलपुरको आज हुने अधिवेशनले नयाँ कार्यसमिति समेत चयन गर्ने छ ।
