सुनवल। सुनवल नगरपालिकाले नगर क्षेत्र भित्र गरिने व्यवसायिक विज्ञापनको कर उठाउने कार्य पहिलो पटक सुरु गरेको छ । चालु आव २०८०/८१ का लागि विज्ञापन कर उठाउने ठेक्काको जिम्मा आकृति एड्भटाईजिङ विराटनगर मोरङले रु २ लाख ९५ हजारमा पाएको नगरपालिकाको राजश्व शाखाले जानकारी दिएको छ ।
नगरपालिका स्थापना काल देखी व्यवसायीहरुले हालसम्म निशुल्क होडिङ वोर्ड विद्युतिय वोर्ड, ग्लो साईन वोर्ड,डी.पी.एस वोर्ड, भित्ते लेखन, तुल, व्यानरबाट विज्ञापन गर्दै आएकोमा अव शुल्क तिर्नु पर्ने नगरपालिकाले जनाएको छ ।
निशुल्क विज्ञापन गर्दै आएका व्यवसायीहरुले अव श्रावणबाट होडिङ वोर्ड, नियोन साईन र ठुला विद्युतीय वोर्डबाट विज्ञापन गरे वापत प्रति वर्गफिट ७५रुपैया, यसैगरी ग्लो साईन वोर्ड, डिपीयस वोर्ड प्रति वर्गफिट ५० रुपैया र भित्तेलेखन तुल व्यानर प्रति वर्गफुट १० रुपैया दिन पर्ने छ । करवाट नगरपालिकाले यसपछि २ लाख ९५ हजार विज्ञापन वापत राजश्व आम्दानी गर्ने नगरपालिकाले जनाएको छ ।
यस्तै कुनै पनि प्रकारको व्यवसाय गर्दा नगरपालिकाबाट पूर्व स्वीकृति लिएर मात्र गर्न तथा नेपाल सरकारको नीति बमोजिम सार्वजनिक स्थलमा विज्ञापन गर्न बन्देज गरेका( मादक पदार्थ, सुर्तिजन्य पदार्थ) जस्ता बस्तुहरुको विज्ञापन गर्न पाईने छैन । नेपाल सरकारका तर्फबाट हुने जनचेतनामुलक सूचना तथा प्रचारप्रसार समाग्रीहरुमा विज्ञापन कर नलिने बताएको छ ।
स्वीकृती नै नलिई राखिएका विज्ञापन सामाग्री हटाउने र स्वीकृती दिन उपयुक्त ठानिएमा लाग्ने करको शत प्रतिशत बराबर जरिवाना लिई स्वीकृती दिन सकिने पनि नगरले जनाएको छ । यस्तै विज्ञापन गर्ने संस्था वा व्यक्तिले स्वीकृत समयावधी समाप्त भएपछि विज्ञापन गर्ने संस्था वा व्यक्तिले स्वयम तुरुन्त हटाउनु पर्ने पनि नगरले जनाएको छ ।
