बर्दघाट नगरको संचार क्षेत्रमा संगलग्न पत्रकारहरुले समाचार विषयका कारण भौतिक असुरक्षा भएको बताएका छन् ।
बर्दघाट प्रेस क्लबले बर्दघाट क्षेत्रमा क्रियाशील पत्रकारहरु असुरक्षित भएको भन्दै बर्दघाट नगरपालिकालाई ज्ञापन पत्र बुझाएको छ । बुधबार बर्दघाट प्रेस क्लब पदाधिकारीको एक टोलीले नगर उप-प्रमुख रुद्रप्रकाश उपाध्याय, नगर प्रवक्ता सन्त बहादुर गाहा, सामाजिक विकास समितिका संयोजक तथा बर्दघाट १६ का वडाध्यक्ष भिमकाजी गुरुङको रोहबरमा नगर प्रमुख शम्भुलाल श्रेष्ठ लाई चौथोअंगको पेशागत तथा भौतिक सुरक्षाको बातवरणको माग गर्दै ज्ञञापनपत्र बुझाएका हुन ।
बर्दघाट नगरभित्रका विभिन्न विषयबस्तुहरुलाई सञ्चार माध्यममा प्रकाशन/प्रशारण गरेकोमा विभिन्न पक्षहरुले समाचार तथा रिपोटसँग सम्बन्धित रहेर संचारकर्मीहरुलाई चेतावनी पुर्ण भाषा तथा अभिव्यक्ति आएको भन्दै क्लबले नगरलाई ध्यानाकर्षण गराएको हो । समाचार लेखनकै विषयलाई लिएर जनताका सेवकहरुले आफ्नो पदिय मर्यादा समेत ख्याल नगरी पत्रकारहरुलाई धम्क्याउने तथा संचार समाग्रीहरु तोडफोड गर्ने प्रयास गर्ने गरीएको ज्ञापन पत्रमा भनीएको छ ।
क्लबद्धारा बुझाईएको ञापन पत्रमा भनिएको छ ‘समाचार लेखनको विषयमा चित्त नबुझे समाचारको खण्डन गर्ने, प्रेस काउन्सिल नेपालमा उजुरी दिन सकिने कानुनी प्रावधान रहेको स्मरण गराउन चाहन्छौँ ।’
नेपालको संविधान २०७२ को धारा १७ को २ (क) मा विचार तथा अभिव्यक्ति स्वतन्त्रता, धारा १९ मा संचारको हक, धारा १९ मा सूचनाको हक अन्तरगत रहेर आफूहरुको ध्यानाकर्षण भएको क्लबको ज्ञापन पत्रमा उल्लेख रहेको छ ।
नगरप्रमुख शम्भुलाल श्रेष्ठले ज्ञापन पत्र स्वीकार गर्दै पत्रकारहरुको सुरक्षा बातावरणको प्रबन्धको ज़िम्मेवारी स्थानीय सरकारको भएकाले निर्धक्क भई काम गर्न टोलीलाई आश्वस्त पारेका छन् ।
